मुंबई : जोगेश्वरी पूर्वेतील ईदगाह मैदान परिसरात चाकू आणि बेसबॉल बॅटचा धाक दाखवत दहशत निर्माण केल्याप्रकरणी मेघवाडी पोलिसांनी एका ३० वर्षीय आरोपीला अटक केली आहे. शमशाद शेख उर्फ भंगारवाला असे अटक करण्यात आलेल्या आरोपीचे नाव आहे. गुन्हा दाखल झाल्यानंतर आरोपी पोलिसांना चकवा देत ठिकाणे बदलत असल्याची माहिती पोलिसांनी दिली.

जुन्या वादातून मारहाण आणि धमकी

पोलिसांच्या माहितीनुसार, १९ ऑगस्ट २०२६ रोजी रात्री साडेदहा वाजण्याच्या सुमारास जोगेश्वरी पूर्व येथील ईदगाह मैदान परिसरात ही घटना घडली. जुन्या वादातून आरोपीने फिर्यादी अदनान इरफान शेख आणि त्यांच्या बहिणीला रस्त्यात अडवल्याचा आरोप आहे.

यावेळी आरोपीने मारहाण करत हातातील चाकू आणि बेसबॉल बॅट हवेत फिरवत परिसरात दहशत निर्माण केली. तसेच शिवीगाळ करून जीवे मारण्याची धमकी दिल्याचा आरोप आहे.

घटनेनंतर मेघवाडी पोलीस ठाण्यात संबंधित कलमांनुसार गुन्हा दाखल करण्यात आला.

ओळख लपवत पोलिसांना देत होता गुंगारा

गुन्हा दाखल झाल्यानंतर आरोपीने स्वतःची ओळख लपवत पोलिसांना चकवा देण्याचा प्रयत्न केल्याचे तपासात समोर आले. आरोपीचा शोध घेण्यासाठी मेघवाडी पोलिसांचे विशेष पथक सक्रिय करण्यात आले होते.

दरम्यान, २३ ऑगस्ट २०२६ रोजी आरोपी प्रेमनगर परिसरात लपून बसल्याची माहिती पोलिसांना मिळाली. या माहितीच्या आधारे पोलिसांनी परिसरात सापळा रचून शमशाद शेखला ताब्यात घेतले.

गुन्ह्यातील हत्यारे शोधण्याचे प्रयत्न

तपासादरम्यान आरोपीने कथित गुन्ह्यात वापरलेला चाकू आणि बेसबॉल बॅट लपवून ठेवल्याचे पोलिसांच्या तपासातून समोर आले आहे. ही हत्यारे शोधण्यासाठी पुढील तपास सुरू आहे.

पोलिसांनी आरोपीला अटक केल्यानंतर न्यायालयात हजर केले असून, प्रकरणाचा पुढील तपास सुरू आहे.

वरिष्ठ अधिकाऱ्यांच्या मार्गदर्शनाखाली कारवाई

ही कारवाई पोलीस उपायुक्त दत्ता नलावडे यांच्या मार्गदर्शनाखाली करण्यात आली. वरिष्ठ पोलीस निरीक्षक शालिग्राम, पोलीस निरीक्षक पवरे आणि पोलीस उपनिरीक्षक सुहास कादे यांच्या नेतृत्वाखाली विशेष पथकाने आरोपीचा शोध घेतला.

या कारवाईत पोलीस हवालदार राजे ठाकूर, पोलीस शिपाई सुनील माने, अक्षय सातपुते, शुभम पाटील, संदीप शिरसाट, आकाश राठोड आणि शैलेश पवार यांनी सहभाग घेतला.

मेघवाडी पोलिसांच्या या कारवाईमुळे जोगेश्वरी परिसरात दहशत निर्माण करण्याचा आरोप असलेल्या आरोपीला अखेर पोलिसांच्या ताब्यात आणण्यात यश आले आहे. या प्रकरणाचा पुढील तपास मेघवाडी पोलीस करत आहेत.