विशेष रिपोर्ट: संदिप कसालकर

महाराष्ट्र पोलीस न्यूज | मुंबई

आगामी गणेशोत्सव व गोपाळकाला शांततेत आणि नियमांचे पालन करून साजरा करा: पोलीस प्रशासनाचे उत्सव मंडळांना आवाहन

मेघवाडी व जोगेश्वरी पोलीस ठाण्याच्या संयुक्त विद्यमाने उत्सव मंडळांच्या पदाधिकाऱ्यांची समन्वय बैठक संपन्न; डीजे बंदी व सुरक्षेबाबत कडक सूचना

आगामी गणेशोत्सव आणि गोपाळकाला (दहीहंडी) उत्सव शांततेत, सुरक्षित वातावरणात आणि शिस्तीत पार पडावा यासाठी पोलीस प्रशासनाच्या वतीने खबरदारीच्या उपाययोजना सुरू करण्यात आल्या आहेत. याच पार्श्वभूमीवर दिनांक २७ ऑगस्ट २०२६ रोजी मेघवाडी पोलीस ठाणे हद्दीतील 'पंत फाउंडेशन हॉल' येथे सार्वजनिक गणेशोत्सव मंडळे आणि दहीहंडी मंडळांच्या अध्यक्ष व प्रमुख पदाधिकाऱ्यांची महत्त्वपूर्ण समन्वय बैठक आयोजित करण्यात आली होती.

या बैठकीला पोलीस उपायुक्त (पश्चिम परिमंडळ १०) दत्ता नलावडे, सहाय्यक पोलीस आयुक्त (मेघवाडी विभाग), वरिष्ठ पोलीस निरीक्षक शाळीग्राम (मेघवाडी पोलीस ठाणे) तसेच जोगेश्वरी पोलीस ठाण्याचे वरिष्ठ पोलीस निरीक्षक इकबाल शिकलगार यांच्यासह पोलीस अधिकारी आणि विशेष पथकाचे अंमलदार उपस्थित होते.

सदर बैठकीत मेघवाडी व जोगेश्वरी पोलीस ठाणे हद्दीतील सुमारे ८० ते १०० मंडळांचे कार्यकर्ते व प्रमुख पदाधिकारी उपस्थित होते. आगामी उत्सवाच्या काळात कायदा व सुव्यवस्था अबाधित राहावी, नागरिकांना कोणताही त्रास होऊ नये आणि सुरक्षेचे नियम पाळले जावेत यासाठी उपस्थित वरिष्ठ पोलीस अधिकाऱ्यांनी पदाधिकाऱ्यांना सविस्तर मार्गदर्शन केले.

पोलीस प्रशासनाकडून मंडळांना देण्यात आलेल्या महत्त्वाच्या मार्गदर्शक सूचना:

• डीजे वापरावर पूर्ण बंदी: गणपती आगमनाच्या वेळी तसेच विसर्जन मिरवणुकीदरम्यान कोणत्याही परिस्थितीत डीजे (DJ) चा वापर करू नये. मिरवणुकीसाठी पारंपारिक बँजो पथकाचा वापर करावा आणि आवाजाची मर्यादा काटेकोरपणे पाळावी.
• ध्वनी प्रदूषण नियंत्रण: ध्वनी प्रदूषणाची पातळी निर्धारित मर्यादेपेक्षा जास्त आढळल्यास संबंधितांवर कठोर कायदेशीर कारवाई केली जाईल.
• कृत्रिम तलावात विसर्जन: ६ फुटांखालील मूर्तींचे विसर्जन स्थानिक पालिका प्रशासनाने उपलब्ध केलेल्या कृत्रिम तलावांमध्येच करावे.
• आगमन व विसर्जन परवानग्या: महत्त्वाच्या मंडळांनी आगमन मिरवणुकीसाठी पोलीस प्रशासनाची रीतसर परवानगी घेणे आवश्यक आहे. तसेच विसर्जनाच्या वेळी पोलीस प्रशासनाने ठरवून दिलेल्या मिरवणूक मार्गात परस्पर कोणताही बदल करू नये.
• ऑनलाइन परवानगी प्रक्रिया: सार्वजनिक गणेशोत्सवासाठी तात्पुरते मंडप उभारण्याकरता महानगरपालिकेच्या एक खिडकी योजनेअंतर्गत अधिकृत पोर्टलवर (`portal.mcgm.gov.in`) वेळेत अर्ज करून रीतसर मंजुरी मिळवावी.
• वाहतुकीला अडथळा नको: गणेशोत्सव मंडळाचे स्टेज किंवा मंडप मुख्य रस्त्यावर अथवा पादचाऱ्यांच्या व वाहनांच्या रहदारीस अडथळा निर्माण होईल अशा पद्धतीने उभारू नये.
• सीसीटीव्ही व २४ तास सुरक्षा: मंडप व आजूबाजूच्या परिसरात सुरक्षेच्या दृष्टीने सुस्थितीतील सीसीटीव्ही (CCTV) कॅमेरे बसवणे बंधनकारक आहे. तसेच मंडपात प्रत्येक वेळी मंडळाचा किमान एक जबाबदार प्रतिनिधी/सेवक उपस्थित राहणे अनिवार्य आहे.
• दहीहंडी सुरक्षा उपाययोजना: दहीहंडी मंडळांनी सराव करताना तसेच उत्सवाच्या दिवशी आवश्यक सर्व सेफ्टी उपकरणांचा व सुरक्षा नियमांचा काटेकोर वापर करावा.