डी. एन. नगर पोलीस ठाण्याचे वरिष्ठ पोलीस निरीक्षक सचिन गवस यांना ‘अति उत्कृष्ट सेवा पदक’ जाहीर; २८ वर्षांच्या धडक कामगिरीचा गौरव
संपादकीय (महाराष्ट्र पोलीस न्यूज) : संदिप कसालकर
गुन्हेगार बदलले... गुन्ह्यांची पद्धत बदलली... तपासाची आव्हाने बदलली... पण एका कर्तव्यदक्ष पोलीस अधिकाऱ्याची तपासाची तीक्ष्ण नजर आणि खाकीप्रती असलेली निष्ठा कायम राहिली! मुंबईतील डी. एन. नगर पोलीस ठाण्याचे वरिष्ठ पोलीस निरीक्षक सचिन राजाराम गवस यांच्या २८ वर्षांच्या प्रदीर्घ आणि उल्लेखनीय सेवेचा गौरव करत त्यांना प्रतिष्ठेचे ‘अति उत्कृष्ट सेवा पदक’ जाहीर झाले आहे.
मुंबई गुन्हे शाखेचे अतिरिक्त पोलीस आयुक्त कृष्णकांत उपाध्याय यांनी पाठवलेल्या शिफारशीची दखल घेत हा बहुमान प्रदान करण्यात आला असून, त्यांच्या सेवाकाळातील अनेक धाडसी व संवेदनशील कामगिरीवर यानिमित्ताने अधिकृत मोहोर उमटली आहे.
२८ वर्षांची प्रदीर्घ आणि निष्कलंक कारकीर्द
सचिन गवस यांनी १ जानेवारी १९९८ रोजी पोलीस दलात प्रवेश केला. १ एप्रिल २०२६ रोजी त्यांच्या सेवेला २८ वर्षे ३ महिने पूर्ण झाली आहेत. या प्रदीर्घ प्रवासात त्यांनी हत्या, दरोडे, जबरी चोऱ्या, बलात्कार, अपहरण, खंडणी, अमली पदार्थ विरोधी कारवाया आणि इतर अनेक गंभीर गुन्ह्यांचा छडा लावला. गुंतागुंतीच्या प्रकरणांचा शास्त्रीय पद्धतीने तपास करणे, अचूक विश्लेषण आणि प्रचंड दबावाखालीही संयमाने तपास पूर्ण करणे हे त्यांचे मुख्य वैशिष्ट्य ठरले आहे.
२६/११ मुंबई हल्ल्याचा तपास ते SIT ची जबाबदारी
सचिन गवस यांच्या कारकिर्दीतील अत्यंत संवेदनशील टप्पा म्हणजे २००८ च्या मुंबई दहशतवादी हल्ल्याच्या तपासासाठी मुंबई दहशतवाद विरोधी पथकाने (ATS) स्थापन केलेली 'विशेष तपास पथक' (SIT). राष्ट्रीय सुरक्षेशी निगडित या ऐतिहासिक आणि अत्यंत गुंतागुंतीच्या तपासात त्यांनी महत्त्वाची भूमिका बजावली होती.
१५० पीडित मुलींची सुटका व ‘ऑपरेशन मुस्कान’
- मानव तस्करीविरोधी धडक: ठाणे ग्रामीणच्या 'अँटी ह्युमन ट्रॅफिकिंग सेल'मध्ये (AHTC) कार्यरत असताना त्यांनी मानवी तस्करीविरोधात व्यापक मोहिमा राबवल्या. यात १५० हून अधिक पीडित मुलींची वेश्याव्यवसायातून सुटका करून त्यांचे सुरक्षित पुनर्वसन घडवून आणले.
- ऑपरेशन मुस्कान: बेपत्ता मुलांचा शोध घेण्याच्या मोहिमेत त्यांनी तब्बल ३८९ हरवलेल्या मुला-मुलींचा शोध घेत त्यांना पुन्हा त्यांच्या कुटुंबीयांच्या स्वाधीन केले.
- परदेशी नागरिकांवर कारवाई: सेवाकाळात ३६ बेकायदेशीर बांगलादेशी नागरिकांचा छडा लावून त्यांना गजाआड केले.
पदके, सन्मान आणि सलग ५ वर्षे ‘Outstanding’ ACR
सचिन गवस यांच्या सेवापुस्तिकेत तब्बल ४५१ पुरस्कारांची नोंद आहे. यामध्ये ४३४ रोख पारितोषिके (एकूण २ लाख ७० हजार रुपये), ८ प्रशस्तीपत्रके आणि ९ विशेष प्रशंसा पुरस्कारांचा समावेश आहे.
- प्रमुख सन्मान: २००५ मध्ये ‘Best Trainee and Sword of Honor of the Batch’, २०१५ मध्ये ‘पोलीस महासंचालक सन्मानचिन्ह’ (DGP Insignia) आणि जानेवारी २०२४ मध्ये गुणवत्तापूर्ण सेवेसाठीचे राष्ट्रपती ‘पोलीस पदक’ (Police Medal for Meritorious Service) देऊन त्यांचा गौरव झाला आहे.
- तपासातील सातत्य: गुन्हे उघडकीस आणण्याबाबत (Detection) त्यांना पोलीस महासंचालक स्तरावर ३ वेळा, तर मुंबई पोलीस आयुक्तांकडून ६ वेळा ‘Best Detection of the Month’ पुरस्कार मिळाला आहे.
- गोपनीय अहवाल (ACR): २०२०-२१ ते २०२४-२५ या सलग पाच आर्थिक वर्षांत त्यांच्या कामाची नोंद ‘Outstanding’ अशी करण्यात आली आहे.
- आंतरराज्य सन्मान: सीमा ओलांडून गुन्हेगारांचा पाठलाग करत त्यांना पकडल्याबद्दल तमिळनाडू, राजस्थान, गुजरात आणि आसाम पोलीस दलांनीही त्यांचा विशेष गौरव केला आहे.
स्वच्छ प्रतिमा आणि कर्तव्यनिष्ठा
या पदकासाठी आवश्यक असलेल्या 'इंटिग्रिटी सर्टिफिकेट'नुसार (Integrity Certificate), सचिन गवस यांच्याविरोधात कोणतीही न्यायालयीन किंवा विभागीय चौकशी प्रलंबित नाही. गेल्या पाच वर्षांत कोणतीही शिक्षा झालेली नसून, त्यांची संपूर्ण कारकीर्द निष्कलंक आणि स्वच्छ राहिली असल्याचे प्रमाणित करण्यात आले आहे.
यापूर्वी गुन्हे शाखेच्या कक्ष-१२ (दहिसर) येथे वरिष्ठ पोलीस निरीक्षक असताना त्यांनी राबवलेल्या धडक कारवाया आणि सध्या डी. एन. नगर पोलीस ठाण्याचे प्रभारी म्हणून सांभाळलेली धुरा, या संपूर्ण प्रवासाची दखल घेऊन त्यांना जाहीर झालेले ‘अति उत्कृष्ट सेवा पदक’ हे मुंबई पोलीस दलाच्या कार्यक्षमतेचा गौरव ठरले आहे.
महाराष्ट्र पोलीस न्यूज हे सेंट्रल प्रेस जर्नालिस्ट असोसिएशन मध्ये संलग्न आहे
